Verður Hodgson þjálfari Ólympíuliðs Englands?

Stjórn enska knattspyrnusambandsins stefnir á að ganga frá ráðningu þjálfara fyrir Ólympíuleikana í London árið 2012 fyrir lok þessa árs.

Nú þegar hefur verið gefið út að landsliðið eigi allt að vera enskt þar á meðal þjálfarinn og því kemur núverandi landsliðsþjálfari Englands, Ítalinn Fabio Capello, ekki til greina í stöðuna.

„Það er stefnan að þjálfarinn verði enskur þó svo að það sé ekki alveg útilokað að við leitum út fyrir landssteinana ef allt annað þrýtur. En þar sem leikarnir fara fram á heimavelli væri náttúrulega skemmtilegast að hafa enska þjálfara," sagði Lord Triesman stjórnarformaður enska knattspyrnusambandsins.

Sögusagnir í breskum fjölmiðlum herma að knattspyrnustjórinn Roy Hodgson hjá Fulham sé líklegastur til þess að hreppa stöðuna.

Stuart Pearce landsliðsþjálfari U-21 árs landsliðs Englands þykir einnig líklegur kandídat þar sem liðið verður skipað leikmönnum 23 ára og yngri fyrir utan þrjá leikmenn sem mega vera eldri.