Fyrrum bankamaður flengir útrásarvíkinga

Menn beita margvíslegum brögðum til að losa sig við reiði og spennu vegna bankakreppunnar. Nú er enn ein leiðin komin fram; að slá útrásarvíkinga með golfkylfu.

„Forsagan er sú að ég var að vinna í banka en missti vinnuna snemma vors. Það var því ekkert annað að gera en að eyða sumrinu út á golfvelli,“ segir Höskuldur Blíðalogn. Nafnið er dulnefni og Höskuldur kýs að koma hvorki fram undir nafni né mynd. Höskuldur hefur hins vegar slegið í gegn með golfkúlur sínar á Facebook-síðu sinni en þar geta kylfingar keypt golfbolta með útrásarvíkingum á.

„Það er afskaplega erfitt að spila golf þegar maður er bæði pirraður og leiður, eins og ég var í sumar. Þannig að ég prófaði að setja mynd af Jóni Ásgeiri Jóhannessyni á eina golfkúluna og viti menn, ég flengdi kúluna eftir brautinni. Horfði á hana allan tímann og þetta bara svínvirkaði.“

Höskuldur fékk því vin sinn til að teikna upp sex útrásavíkinga, lét prenta þá á Srixon-golfbolta og hefur fengið mikil og góð viðbrögð. „Fyrsta pöntun er næstum uppseld og önnur á leiðinni,“ útskýrir Höskuldur og bætir því við að myndirnar merjist ekki mikið þótt kúlurnar lendi í stein. Þá muni tveir útrásavíkingar bætast í hópinn í næstu pöntun.

Og það er kannski kaldhæðni örlagann að Höskuldur hefur fengið fyrirspurnir erlendis frá. „Já, það eru einhverjir sem hafa beðið um kúlur með Gordon Brown. Fólk er alltaf pirrað útí stjórnmálamenn og ég sé því ekkert til fyrirstöðu að búa til kúlur með Brown, Darling og kannski Bush og Cheney fyrir Bandaríkjamarkað.“

freyrgigja@frettabladid.is