Meistaraverk HAM í pípunum

„Goðsagnakennt“ er lýsingarorð sem alltof oft heyrist og er jafnvel slengt á allskonar hundómerkilegt dót. En eigi einhver hljómsveit inni fyrir þessu lýsingarorði er það að sjálfsögðu hin goðsagnakennda hljómsveit HAM.

Þessar magnþrungnu risaeðlur hafa skriðið úr greni sínu sirka einu sinni á ári síðustu árin til að spila gamla slagara fyrir stjarfa hjörð aðdáenda. Nú hillir loksins undir „alvöru“ HAM-plötu með nýju efni.

„Já, ég myndi segja að nú sé klassísk HAM-plata að verða til. Það hlýtur bara að vera miðað við hvað við höfum verið kreatífir,“ segir Sigurjón Kjartansson. „Þetta verður fyrsta alvöru HAM-platan síðan Buffalo Virgin kom út fyrir tuttugu árum. Við getum kannski kallað Dauður hestur heilsteypt verk þó að það sé samansafn. Svo eru þetta bara læfplötur.“

HAM spilar tvö gigg í ár. Bandið var á Eistnaflugi í sumar og spilar á rokkhátíðinni Reykjavík to Rotterdam í Hollandi 18. desember næstkomandi.

„Þetta er stórmerkilegt gigg með einhverjum öðrum íslenskum hljómsveitum sem ég veit ekkert hverjar eru (UMTBS, Benny Crespo’s Gang,

Mugison og Bloodgroup - innskot höfundar),“ segir Sigurjón. „Ég fylgist lítið með músík og hef lítið gaman af músík nema minni eigin. Við ætluðum að taka Berlín í leiðinni en það varð að fresta því. Berlínarbúar hafa ekki séð okkur í 21 ár og verða því bara að bíða aðeins lengur. Rotterdambúar eru hreinar meyjar þegar kemur að HAM. Við ætlum að spila mikið af nýja efninu, en þetta er svo sem allt nýtt fyrir þeim. Þetta er ágætt eins og við höfum haft þetta. Við spilum kannski eitthvað aðeins meira ef við gefum út á næsta ári, sem ég get ekki lofað. En ég vildi allavega vilja sjá okkur taka plötuna upp á næsta ári hvort sem við gefum hana út þá eða 2011. Hmmm...? Jú, það er aldrei að vita nema við verðum með meistarastykkið á næsta ári.“

drg@frettabladid.is