SMS-óður Heskey fékk hárblástur frá Capello

Fabio Capello varð brjálaður út í Emile Heskey á dögunum er hann greip framherjann glóðvolgan við að senda sms er enska landsliðið var að borða hádegismat. Heskey reyndi að fara lymskulega með símann og sendi sms-ið með símann undir borðinu.

Ein af aðalreglum Capello er sú að leikmenn taka ekki með sér gemsana í máltíðir en sms-in máttu greinilega ekki bíða hjá Heskey.

Ítalinn varð svo reiður er hann sá Heskey að hann kastaði matarbakkanum sínum í gólfið. Hann minnti leikmenn sína síðan góðfúslega á að fylgja settum reglum.

Atvikið átti sér stað í undirbúningnum fyrir leikinn gegn Úkraínu sem England tapaði.

Heskey var í liðinu þrátt fyrir allt en var tekinn af velli í síðari hálfleik. Hann var síðan ekki einu sinni í leikmannahópnum í næsta leik.

Stuart Pearce, aðstoðarmaður Capello, hefur greint frá því að hjá Capello fái menn aðeins eina aðvörun, síðan eru þeir horfnir úr hópnum. Heskey þarf því að passa sig ef hann vill halda sæti sínu í landsliðshópnum.