Þreifingar við Breta vegna fyrirvara um ríkisábyrgð

Fréttablaðið hefur heimildir fyrir því að óformlegar þreifingar hafi átt sér stað á milli Íslendinga annars vegar og Breta og Hollendinga hins vegar vegna afgreiðslu Alþingis á frumvarpi um ríkisábyrgð vegna Icesave.

Viðsemjendur hafa verið upplýstir um að mögulega verði settir fyrirvarar um samninginn. Viðræðurnar eru mjög óformlegar.

Svavar Gestsson, formaður samninganefndar Icesave, kannast ekki við viðræðurnar, enda hafi hans hlutverki lokið þegar skrifað var undir samninginn. Hann segir ómögulegt að segja hver yrðu viðbrögð Breta og Hollendinga við fyrirvörum. „Ég veit ekki um það, en mér finnst ekki skrýtið að Alþingi velti öllu mögulegu fyrir sér varðandi pólitíska umgjörð málsins. Alþingi hefur síðasta orðið í því, eins og því hvort það samþykkir samninginn eða synjar honum.

Upphaflega var gert ráð fyrir því að málið kæmi úr nefndum fyrir helgi og til annarrar umræðu á Alþingi. Nú eru allar líkur á að það verði ekki fyrr en eftir helgina. Verið er að reyna að ná samstöðu um samþykkt afgreiðslu þingsins, hvaða fyrirvara eða samþykktir þingið gerir vegna ríkisábyrgðarinnar. Mögulegt er að stjórnarandstaðan, eða hluti hennar, sameinist stjórninni um þær tillögur.

Samkvæmt heimildum Fréttablaðsins er líklegt að frumvarpið verði samþykkt á Alþingi. Í greinar-gerð með því yrði hins vegar kveðið á um ríkari endurskoðunarákvæði, jafnvel færi á einhliða uppsögn, og greiðslubyrði.

Fjármálaráðherra staðfesti í gær frétt Fréttablaðsins um að erlendar skuldir þjóðarbúsins stefni í að vera yfir 200 prósent af vergri landsframleiðslu.

Í tilkynningu frá ráðuneytinu segir að miðað við að verg landsframleiðsla verði tæpir 1.430 milljarðar á þessu ári, nemi sú tala um 2.800 til 3.000 milljörðum miðað við þær uppgjörsaðferðir sem Seðlabankinn og fjármálaráðuneytið nota. - kóp /