Mikill erill og fullar fangageymslur

Mikill erill var hjá lögreglunni á höfuðborgarsvæðinu í gærkvöldi og í nótt vegna ölvunar og afbrota, og eru fangageymslurnar í Reykjavík fullar eftir nóttina. Þar dvelur meðal annars par, sem reyndi að svíkja út vörur í Lyfju með stolnu greiðslukorti og tveir karlmenn, sem handteknir voru eftir að hafa ekið bíl á vegrið í grennd við Höfðabakkabrúna.

Lögregla leitar hinsvegar enn manna, sem kveiktu í ferðaklósettunum við Esjurætur í Kollafirðinum, þjófs sem braust in í kaffihús við Skólavörðustíg og stal þaðan peningum, annars þjófs sem braust inn í söluturn í Seljahverfi og stal þaðan einhverju, og þess sem ætlaði að brjótast inn í gæludýraverslun í Kópavogi, en lagði á flótta eftir að hafa brotið upp útihurðina.