Pennant: Benitez reyndi að gera mig að vélmenni

Jermaine Pennant segir að Rafa Benitez, stjóri Liverpool, hafi reynt að gera sig að vélmenni á þeim þremur árum sem hann var hjá félaginu.

Pennant gekk til liðs við Real Zaragoza á Spáni í sumar en sagði í samtali við News of the World í dag að hann sé því feginn að vera laus frá Liverpool.

„Þegar ég var við hliðarlínuna heyrði ég í engum nema Benitez að gefa mér tilmæli," sagði Pennant. „Ég hugsaði stundum með mér að hann ætti frekar að setja í mig rafhlöður og gera mig að vélmenni."

„Ég vildi bara spila minn fótbolta en það voru svo mörg tilmæli - hvernig ég átti að sækja fram og verjast."

En hann segist njóta sín nú hjá Zaragoza og hefur sett stefnuna á að komast í enska landsliðshópinn fyrir HM í sumar.

„Ég hef aldrei verið valinn í landsliðið en er ekki búinn að gefa upp alla von. Ian Wright komst inn í landsliðið 26 eða 27 ára gamall og ég veit að það er vel hægt."