Tryggvi: Stjórnin fallin náist ekki meirihluti

„Þetta lýsir samstöðuleysi innan stjórnarflokkanna í þessu máli. Þetta virðist vera að sigla í alveg sama horf og í sumar þegar órólegadeildin í Vinstri grænum átti mjög erfitt með að samþykkja þetta," segir Tryggvi Þór Herbertsson, þingmaður Sjálfstæðisflokksins.

Meirihlutinn í efnahags- og skattanefndar er klofinn í afstöðu sinni til frumvarps um ríkisábyrgð vegna Icesave reikninga Landsbankans. Þingmenn VG og Samfylkingar í nefndinni standa að tveimur álitum til fjárlaganefndar.

Tryggvi, sem á sæti í efnahag- og skattanefnd, segir að allt líti út fyrir að stjórnarandstaðan muni öll greiða atkvæði gegn frumvarpinu. Niðurstaðan í þinginu verði að öllum líkindum afgerandi ólíkt því þegar sjálfstæðismenn sátu flestir hjá við afgreiðslu málsins í sumar.

Tryggvi segist ekki gera sér grein fyrir því hvort að það sé meirihluti í þinginu fyrir frumvarpinu. „Ef flokkarnir eru ekki með meirihluta í málinu er ríkisstjórnin búin að vera.“