Fall krónunnar: Flugeldasýningin styttri en í fyrra

Um eitt hundrað þúsund manns fylgdust með flugeldasýningunni í miðborg Reykjavíkur í gærkvöldi. Sýningin var þó styttri en í fyrra og kenna forsvarsmenn hátíðarinnar falli krónunnar um, því sömu krónutölu hafi verið varið til flugeldakaupa.

Flugeldasýningin hófst klukkan ellefu og var hún í boði Orkuveitu Reykjavíkur. Sýningin var glæsileg að vanda og mannfjöldinn mikill.

Mörgum þótti flugeldasýningin þó heldur styttri en í fyrra. Þrátt fyrir að kreppan hafi ekki haft áhrif á sköpunargleðina á menningarnótt virðist hún hafa bitnað á flugeldakaupum því færri flugeldar fengust fyrir sömu upphæð og í fyrra, vegna falls krónunnar segir Skúli Gautason verkefnastjóri menningarnætur. En tveimur og hálfri milljón hefur verið varið í flugeldasýninguna síðustu fjögur ár.

Þá fóru fram þrennir tónleikar á Skólavörðustíg, Ingólfstorgi og í Hljómskálagarðinum í gærkvöldi. Páll Óskar, Þursaflokkurinn, Papar og fleiri stigu á svið í Hljómskálagarðinum og á Ingólfstorgi voru tónleikar með Megasi, Hjaltalín og Baggalúti.

Forsvarsmenn menningarnætur segja hátíðina hafa gengið með ólíkindum vel. Umferð úr miðborginni hafi komist í gott horf á innan við klukkustund eftir flugeldasýninguna. Engin stórmál komu inn á borð lögreglu eftir nóttina fyrir utan átta minniháttar líkamsárásarmál sem tengd voru ölvun.