Bjarni: Ekki hægt að skýla sér á bak við bankaleynd

„Staðreyndin er að það er ekki endalaust hægt að skýla sér á bak við bankaleynd. Það á að vera tiltölulega auðvelt að setja skýrar reglur sem allir geta skilið þar sem tryggt er að sambærileg mál fái líka meðhöndlun og þar sem bankarnir geta tjáð sig um það að þeir telja að í tilteknu tilviki hafi áframhaldandi eignarhald viðkomandi eiganda verið mikilvægt," sagði Bjarni Benediktsson, formaður Sjálfstæðisflokknum, í umræðum á Alþingi í dag.

Í ljósi umræðu undanfarna daga um afskriftir skulda vildi Bjarni vita hvaða hugmyndir ríkisstjórnin hafi til að eyða óvissu vegna þessa. Bjarni spurði Steingrím J. Sigfússon, fjármálaráðherra, hvað standi til að gera til að efla traust á fjármálastofnunum.

Steingrímur svaraði fyrirspurn Bjarna á þá leið að sem betur sæi fyrir endann á endurreisn bankana. „Þá hefur orðið sú breyting á því að forræði fyrir eignarhaldi á stóru bönkunum þremur er farið frá fjármálaráðuneytinu til bankasýslunnar í samræmi við lög."

Steingrímur sagði að bankasýslan eigi meðal annars að tryggja að eigendastefnu ríkisins sé framfylgt. Auk þess hafi bankarnir verið að móta sýna aðferðafræði. Steingrímur sagði mikilvægt að þetta sé unnið á faglegan og samræmdan hátt.

Bjarni sagði rétt að bankarnir hefðu verið að móta sína aðferðafræði. „Vandinn liggur í því að það er ekki traust á þessa stefnu. Fólk skilur ekki af hvenær skuldir eru afskrifaðar og hvaða reglur gilda," sagði Bjarni. Grípa verði inn í því annars muni núverandi stefna leiða til gríðarlegrar sóunar og undanskots eigna.

Steingrímur sagðist vona að Bjarni væri ekki að tala fyrir pólitískri íhlutun um einstök mál og sagði bankasýslu ríkisins meðal annars hafa verið stofnaða til að koma í veg slík afskipti stjórnmálamanna.