Ótakmarkað stuð í kvöld

Hljómsveitin 2 Unlimited með söngkonuna Anitu Doth í fararbroddi spilar á Broadway í kvöld. Sveitin var stofnuð árið 1991 og vakti fljótt mikla athygli. Hún átti sextán lög sem rötuðu á vinsældalista Evrópu á tíunda áratugnum, þar á meðal Get Ready For This, Twilight Zone, Tribal Dance og að sjálfsögðu hið ódauðlega No Limit.

Síðustu þrettán ár hefur Anita verið kyndilberi hljómsveitarinnar og þykja tónleikar hennar með eindæmum skemmtilegir. Ásamt Anitu koma fram þrautreyndir erlendir dansarar og verður ekkert til sparað í að gera þetta að eftirminnilegu partíi.

Miðasalan fer fram á Skor.is og kostar 2.500 krónur inn. Húsið verður opnað á miðnætti og þeir sem koma einnig fram verða Sindri BM, Frigore, Haffi Haff og Þórhallur Skúlason, eða Ajax.