„Ég og vinir mínir sem settum upp sýninguna Húmanimal í Hafnafjarðarleikhúsinu síðasta vor stöndum nú í ströngu við að æfa sýninguna upp á ensku,“ segir Álfrún Helga Örnólfsdóttir leikkona. Tilefni þess að hópurinn ræðst í að æfa sýninguna á ensku er þátttaka þeirra á LÓKAL-leiklistarhátíðinni sem fer fram dagana 3. til 6.september næstkomandi, en Húmanimal hlaut einróma lof gagnrýnenda og níu tilnefningar til Grímunnar 2009.
„Mörg verkanna á hátíðinni eru flutt á ensku og er þetta því einstakt tækifæri fyrir enskumælandi fólk að kynna sér þverskurðinn af því mest spennandi sem er að gerast í leikhúslífi Íslendinga. Húmanímal er að vísu mjög myndræn sýning og því ekki nauðsynlegt að skilja hið talaða mál hennar til að njóta verksins, en okkur fannst hins vegar spennandi verkefni að yfirfæra textann á engilsaxnesku og kynnast textunum upp á nýtt því annað tungumál setur nýjan blæ á senurnar,“ útskýrir Álfrún.
„Færri komust að en vildu á sýningar vorsins, en í framhaldi af hinni ensku útgáfu af Húmanímal sem verður sýnd hinn 5. september í Hafnafjarðarleikhúsinu verða fjórar aukasýningar á íslensku,“ bætir hún við, en nánari upplýsingar má nálgast á hhh.is. - ag
