Engum alikálfi slátrað á þingflokksfundi Sjálfstæðisflokksins

Jón Magnússon sem verið hefur utan flokka eftir að hann sagði skilið við Frjálslynda flokkinn gekk í dag til liðs við Sjálfstæðisflokkinn. Hann segir engum alikálfi hafa verið slátrað á þingflokksfundi í dag þegar endurkoma hans var tilkynnt en Jón var áður varaþingmaður flokksins.

„Týnda syninum er alltaf vel tekið þegar hann kemur heim en það var engum alikálfi slátrað sem betur fer," segir Jón aðspurður um viðtökurnar á þingflokksfundi sjálfstæðismanna í dag.

Hann segist enn vera að velta fyrir sér hvort hann sé kominn heim en það taki yfirleitt einhvern tíma eftir langan aðskilnað. Jón var á árum áður mikill sjálfstæðismaður og gegndi meðal annars formennsku í Heimdalli félags ungra sjálfstæðismanna í Reykjavík.

Hann segir ekki hafa komið til greina að fara í annan flokk eftir að hann sagði skilið við Frjálslynda.

„Ég fékk ýmsar áskoranir frá ýmsum flokksmönnum sem töldu að þetta hefði mikla þýðingu og skipti máli fyrir flokkinn. Þeir vildu meina að þeir sem hefðu verið í frjálslynda armi flokksins tækju þátt í störfum hans. Ég taldi að núna væri lag til þess að byggja upp Sjálfstæðisflokkinn sem þann þjóðarflokk sem ég hef alltaf viljað," segir Ólafur.

Hann segist yfirleitt vera fljótur að taka ákvarðanir þegar hann taki þær en ekki hafi farið fram neinar formlegar viðræður fyrr enn seinni partinn í gær og síðan í dag.

Jón segir að næsta ákvörðun snúist síðan um hvort hann fari í prófkjör fyrir alþingiskosningar. „Nú þarf ég að vera í sambandi við þá sem hafa lagt hart mér að gefa kost á mér og ég útiloka ekki neitt. Sú ákvörðun verður að bíða þar til í fyrramálið."