Segir skilanefndarfólk verða voldugustu menn landsins

„Þetta verða voldugustu menn Íslands," segir Eygló Harðardóttir, þingmaður Framsóknar, um nefndarmenn skilanefnda gömlu bankanna. Hún gagnrýnir ýmislegt við samkomulag stjórnvalda við skilanefndir bankanna sem kynnt var á blaðamannafundi í morgun, en Eygló var viðstödd fundinn og bar upp spurningar ásamt fjölmiðlum.

Meðal annars segir hún að ef skilanefndir Glitnis og Kaupþings fari með hlut þrotabúsins í nýju bönkunum verði skilanefndirnar eins og ríki í ríkinu. Þannig jánkar Eygló því að mikil völd safnist á mjög fárra hendur.

Þá gagnrýnir hún einnig að ekkert í löggjöfinni tryggi að eigendur bankanna kunni að reka banka. Til dæmis sé ekkert í samkomulaginu sem kemur í veg fyrir að fyrrum eigendur bankanna geti eignast þá upp á nýtt.

En telur hún líklegt að þeir muni yfir höfuð sækjast eftir því?

„Það er allavega ekkert sem kemur í veg fyrir það. Það ætti kannski að vera einhver trygging fyrir því að þeir sem eiga bankanna séu aðilar sem við viljum sem eigendur."

Þess má þó geta að í fréttatilkynningu sem fjármálaráðuneytið sendi út í morgun kemur fram að vonir standi til að þeir sem eignist bankana og reki þá á endanum búi yfir nytsamlegri þekkingu á bankarekstri.

Þá segir Eygló þetta samkomulag setja ýmsa vinnu í þinginu í uppnám.

„Hvað verður um bankasýsluna, eignaumsýslufélagið, lagaumhverfið sem við höfum undirbúið að breyta?"

Eygló áréttar að lokum að samkomulagið sem kynnt var í morgun nái aðeins til skilanefndanna - enn eigi eftir að ná samkomulagi við kröfuhafana sjálfa.