Sundlaugin að kaffæra sveitarfélagið

Sveitarfélagið Álftanes þarf að óbreyttu að greiða meira en 200 milljónir króna í leigugreiðslur á næsta ári til Eignarhaldsfélagsins Fasteignar (EFS) vegna sundlaugar sem tekin var í notkun í sumar, að sögn Kristins Guðlaugssonar, forseta bæjarstjórnar. Leigugreiðslur til Fasteignar á þessu ári eru áætlaðar um 160 milljónir króna. Bæjarstjórnin samþykkti í fyrrakvöld að óska eftir aðkomu EFS að rekstri Álftaness. Sveitarstjórn er samkvæmt lögum skylt að leita til eftirlitsnefndar sveitarfélaga ef hún telur sér ekki unnt að standa í skilum.

EFS hefur ekki hafið formleg afskipti af málum Álftaness, að sögn Jóhannesar Finns Halldórssonar, starfsmanns nefndarinnar, en bæjarstjórn þarf að samþykkja á tveimur fundum að leita til nefndarinnar áður en hún tekur til starfa. Boðað hefur verið til aukafundar í bæjarstjórninni í næstu viku til þess að afgreiða málið endanlega.

Bæjarstjórnin samþykkti einnig í fyrrakvöld endurskoðaða fjárhagsáætlun fyrir þetta ár. Samkvæmt henni verður 86 milljóna króna halli á rekstrinum. Í fyrra var hallareksturinn 832 milljónir króna. Þá voru tekjurnar um 1.160 milljónir en eftir endurskoðun fjárhagsáætlunar þessa árs er gert ráð fyrir rúmlega 1.300 milljóna króna tekjum í ár.

Kristinn Guðlaugsson sagði við Fréttablaðið að samningurinn, sem gerður var árið 2007, við Eignarhaldsfélagið Fasteign væri stór þáttur í vanda sveitarfélagsins þótt fleiri þættir hefðu þar áhrif.

Jóhannes Finnur segir EFS ekki munu skoða fjárhag Álftaness formlega fyrr en eftir að málið hafi verið rætt öðru sinni í sveitarstjórninni á sérstökum aukafundi sem boðaður hefur verið í næstu viku. Þegar afskiptin hefjast mun EFS gera sjálfstæða rannsókn á fjárreiðum Álftaness og leggja áherslu á að vinna málið hratt og í samstarfi við sveitarstjórnina. Samkvæmt lögum er heimilt að hækka útsvar og fasteignaskatta um allt að 25 prósent ef sveitarfélag getur ekki „með eðlilegum rekstri staðið straum af lögboðnum útgjöldum eða öðrum skuldbindingum sínum“. Jóhannes Finnur segir ekki tímabært að tjá sig um hvort til slíkra úrræða verði gripið.

peturg@frettabladid.is