Arshavin klár í slaginn um helgina

Andrey Arshavin hefur jafnað sig af meiðslum sínum og getur spilað með Arsenal gegn Fulham um helgina.

Þetta staðfesti Arsene Wenger, knattspyrnustjóri Arsenal, í samtali við enska fjölmiðla.

Arshavin hefur ekki spilað með Arsenal síðan hann meiddist í landsleik Rússa og Wales í upphafi mánaðarins.

„Arshavin veitir okkur ákveðna möguleika í sóknarleik okkar sem eru alltaf mjög áhugaverðir. Hann nýtist okkur einnig sérstaklega vel þegar við spilum á útivelli."

„Hann er einmitt sá leikmaður sem getur skorað mikilvæg mörk einn og óstuddur."

Þá gæti verið að Theo Walcott spili með Arsenal um helgina en hann hefur einnig verið frá vegna meiðsla. Hann spilaði í 45 mínútur með félaginu gegn West Brom í enska deildabikarnum í vikunni.