Móðir Heiðmerkurhrotta: „Þetta er bara rosalegt"

„Ég get bara sagt þér það að ég var ekki búin að heyra neitt af þessu nema úti í bæ," sagði móðir unglingsstúlku sem er sökuð um að vera ein af sjö árásamönnum sem gengu hrottalega í skrokk á fimmtán ára stúlku í gær.

Móðir stúlkunnar var í miklu tilfinningalegu uppnámi þegar blaðamaður ræddi við hana.

Hún sagðist ekki hafa talað við dóttur sína síðan málið komst í fréttirnar, né hafði nokkur annar haft samband við hana. Það eina sem hún vissi var það sem hún las og heyrði í fjölmiðlum.

Stúlkurnar gáfu sig fram upp úr hádeginu í dag en lögreglan tók ekki skýrslu af þeim. Ástæðan er sú að stúlkurnar eru undir lögaldri og því þarf að hafa samband við foreldri eða barnaverndaryfirvöld.

Samkvæmt heimildum Vísis voru það tvær stúlkur sem höfðu sig mest frammi í árásinni. Dóttir móðurinnar sem Vísir ræddi við, er önnur þeirra. Stúlkurnar eru nemar í Flensborg. Þær eru sautján ára gamlar.

Líkamsárásin var hrottaleg og fólskuleg. Stúlkurnar linntu ekki barsmíðunum fyrr en piltur, sem var með þeim, stöðvaði þær. Í kjölfarið var fórnalambinu ekið inn í Hafnarfjörð og það skilið eftir við verslunarmiðstöðina Fjörðinn. Þaðan hringdi hún í foreldra sína sem komu henni undir læknishendur. Hún er mjög bólgin og illa farin eftir árásina samkvæmt systur hennar.

Þegar blaðamaður spurði móður stúlkunnar sem er sökuð um ódæðið hvað henni fyndist um málið, svaraði hún grátandi: „Þetta er bara rosalegt."