Gerrard: Réttarhöldin breyttu mér

Steven Gerrard, fyrirliði Liverpool, segir að það hafi breytt sér að hafa þurft að mæta fyrir dómara eftir að hann var kærður fyrir óspektir vegna atviks sem átti sér stað í skemmtistað í desember síðastliðnum.

Gerrard var fundinn sýkn saka en hann segir reynsluna af réttarhöldunum engu af síður hafa verið mjög svo óskemmtilega.

Hann var að fagna því að Liverpool vann 5-1 sigur á Newcatle og kom sér um leið á topp ensku úrvalsdeildarinnar.

„Réttarhöldin breyttu mér," sagði hann í samtali við enska fjölmiðla. „Ég lærði ýmislegt af þeim. Ég var á röngum stað á röngum tíma. Ég þarf að sýna meiri aðgát í framtíðinni - hvenær ég fer út og hvert ég fer."

„Ef við vinnum leiki 5-1, ég skora tvö mörk og við förum á topp deildarinnar mun ég framvegis ekki fara og fagna því með félögum mínum úti á lífinu. Ég mun fara út að borða og koma mér heim fyrir klukkan hálf tíu. Við fáum mjög vel borgað og maður verður að fórna ýmislegu."