Steven Tyler yfirgefur Aerosmith

Steven Tyler, söngvari Aerosmith, yfirgaf sveitina á tónleikum í Abu Dhabi fyrir tæpum mánuði. Hann er sagður hættur öllu rokkstússi.

Hljómsveitin var að spila í Abu Dhabi fyrir um mánuði síðan og eftir að ellismellirnir höfðu lokið sér af lét Tyler sig hverfa uppí flugvél og hefur hvorki talað við kóng né prest síðan þá. Gítarleikari hljómsveitarinnar og hennar helsti lagasmiður, Joe Perry, segir í samtali við Las Vegas Sun að hann búist ekki við því að Tyler snúi aftur. „Hann er hættur en ég veit ekkert meira um málið. Ég kom frá Abu Dhabi fyrir tveimur dögum og las á netinu að Tyler hyggðist segja skilið við okkur,“ segir Perry.

Perry heldur því jafnframt fram að söngvarinn taki hvorki síma né svari neinum skilaboðum frá öðrum hljómsveitarmeðlimum þannig að þeir standa í raun á gati hvað þett varðar. „Hann hefur hvorki sett sig í samband við mig né hina meðlimi Aerosmith til að ræða þessa hluti. Hann er reyndar frægur fyrir svona stæla og ég hef bara lært að lifa með þeim,“ útskýrir Perry í viðtalinu við Las Vegas Sun.

Og Perry segir Tyler augljóslega hafa misst áhugann, hann hafi ekki gefið sig allan í þau verkefni sem sveitin hafi verið að sinna og þetta sé niðurstaðn. „Hann var greinilega búinn að hugsa um þetta í mjög langan tíma. Mér þykir enn vænt um hann sem manneskju, allavega þá manneskju sem ég þekkti einu sinni, en mér þykir það jafnframt lélegt að láta okkur lesa um þetta á netinu.“ Perry tekur reyndar skýrt fram í viðtalinu að sveitin sé hvergi nærri hætt, með brotthvarfi Tyler geti þeir fundið nýjan og betri hljóm.-fgg