Letterman fluttur út

David Letterman er fluttur út af heimili sínu og eiginkonu sinnar og dvelur nú í íbúð sinni á Manhattan. Stutt er síðan upp komst um framhjáhald Lettermans, en hann hafði þá haldið við unga aðstoðarkonu sína um nokkra hríð.

„Dave er fluttur út eftir að Regina lét hann hafa það óþvegið. Hann tók sér nokkurra daga frí frá vinnu til að reyna að bæta sambandið en það gerði sambandið aðeins verra ef eitthvað er. Regina heimtaði að hann væri algjörlega hreinskilinn við hana en hann tók því heldur illa. Regina varð mjög ósátt og bað hann um að koma sér út," var haft eftir innanbúðarmanni. Regina á nú að vera að íhuga framhaldið og vill að endanleg ákvörðun verði tekin áður en árið er liðið.

„Hún vill ekki skilja en hún vill heldur ekki láta særa sig aftur. Henni finnst sem Dave hafi gert hana að athlægi."