Segir lög um kynjakvóta skila betri stjórnun fyrirtækja

Það hefur gengið mjög vel í Noregi eftir að lög um kynjakvóta í stjórnum fyrirtækja voru sett, segir Sóley Tómasdóttir, borgarfulltrúi Vinstri grænna.

Árni Páll Árnason félagsmálaráðherra sagði á ráðstefnu um Kyn og völd í morgun að verði kynjahlutföll ekki orðin jafnari í stjórnum fyrirtækja landsins fljótlega eftir áramót þurfi að breyta lögum.

Sóley, sem hefur verið áberandi í umræðunni um aukin rétt kvenna, segist ekki hafa heyrt ræðu Árna. Hún þekki hins vegar þær hugmyndir sem þarna séu reifaðar.

„Í Noregi hefur þetta gengið mjög vel. Hlutfall kynjanna hefur jafnast mjög síðan þessi löggjöf var tekin upp þar," segir Sóley. Hún segir augljóst að kynjahlutföll breytist ekki af sjálfu sér. Því sé mikilvægt að stjórnmálafólk taki af skarið.

„Það er búið að vera lýðveldi hérna í rúm sextíu ár og við búin að búa hérna í þúsund ár og aldrei hafa konur náð að taka þátt í að stjórna þessu landi til jafns við karla og það er alveg ljóst að það þarf að grípa til einhverrra aðgerða sama hvort þær eru tímabundnar eða ekki," segir Sóley.

Sóley segist vera sannfærð um að löggjöfin hafi skilað Norðmönnum betri stjórnun fyrirtækja. „Rannsóknir sýna það. Bæði úttektir á hlutföllum kynjanna í stjórnum. Svo hafa rannsóknir bara sýnt það, að þar sem að stjórnir eru fjölbreyttar bæði hvað varðar kyn og reynslu fólks, að þau fyrirtæki standa betur," segir Sóley.

Aðspurð segist Sóley jafnframt viss um að löggjöf sem þessi standist stjórnarskrá. „Stjórnvöld eru til þess að hlutast til um það hvernig fyrirtækjum er stjórnað. Það eru allskonar ákvæði um það hvernig eigi að stjórna fyrirtækjum. Það er ekkert sem segir að það megi ekki setja lög um þetta eins og svo margt annað," segir Sóley.

Loks segir Sóley að stjórnvöldum beri að hafa afskipti af því ef eitthvað sé ekki eins og samfélagsþegnar hafi komið sér saman um það hvernig hlutirnir eigi að vera.