Gerrard snýr aftur en Torres enn fjarverandi

Steven Gerrard, fyrirliði Liverpool, er klár í slaginn að nýju og mun spila með Liverpool gegn Lyon í Meistaradeildinni á morgun.

Gerrard gat ekki spilað með Liverpool í leiknum gegn Sunderland um helgina þar sem hann var meiddur á nára. Hann virðist nú vera orðinn góður af meiðslunum.

Sömu sögu er ekki að segja af framherjanum Fernando Torres sem er ekki enn byrjaður að æfa og spilar tæplega á morgun.

Liverpool er í þriðja sæti síns riðils í Meistaradeildinni eftir að hafa unnið og tapað fyrstu tveimur leikjum sínum.

Lyon að sama skapi hefur unnið báða sína leiki og leikurinn á morgun því afar mikilvægur.