Giggs tæpur en Rooney líklega með

Óvissa er um hvort Ryan Giggs geti leikið með Man. Utd gegn CSKA Moskva í Meistaradeildinni en hugsanlegt er að Wayne Rooney verði tilbúinn í slaginn.

Giggs varð fyrir hnjaski í leiknum gegn Bolton um helgina. Það eru fleiri leikmenn tæpir hjá United og nægir þar að nefna Nemanja Vidic og Patrice Evra.

Rooney og Vidic spiluðu ekki um helgina gegn Bolton og Evra fór af velli undir lokin.

Sir Alex Ferguson, stjóri Man. Utd, er bjartsýnn á að geta notað Rooney í Meistaradeildinni en segir pottþétt að hann nái leiknum gegn Liverpool um næstu helgi.