Zamora skoraði eitt og lagði upp annað í sigri Fulham

Einn leikur fór fram í ensku úrvalsdeildinni í kvöld þar sem Fulham vann 2-0 sigur gegn Hull á Craven Cottage-leikvanginum í Lundúnum.

Bobby Zamora kom heimamönnum í Fulham yfir með góðu marki þegar skammt var eftir af fyrri hálfleik en framherjinn hefur verið mikið meiddur á yfirstandandi keppnistímabili.

Zamora var aftur á ferðinni á 63. mínútu þegar hann lagði upp mark með fastri fyrirgjöf eða skoti á fjærstöng þar sem Diomansy Kamara var mættur og potaði boltanum í netið.

Hvorugu liðinu tókst að skora eftir það og niðurstaðan því sem segir 2-0 sigur Fulham.

Hull er því enn í fallsæti en getur þó huggað sig við að miðjumaðurinn Jimmy Bullard kom inn á sem varamaður í síðari hálfleik en hann hefur lítið getað spilað fyrir félagið síðan hann kom frá Fulham vegna erfiðra hnémeiðsla.