Fabregas frábær í stórsigri Arsenal á Blackburn

Cesc Fabregas, spænski miðjumaðurinn hjá Arsenal, sýndi snilli sína í 6-2 sigri Arsenal á Blackburn í ensku úrvalsdeildinni í dag. Fabregas átti þátt í fyrstu fimm mörkum Arsenal, skoraði eitt og átti fjórar stoðsendingar.

Blackburn komst tvisvar yfir í frábærum fyrri hálfleik, fyrst með skallamarki Steven Nzonzi á 4. mínútu eftir langa aukaspyrnu Paul Robinson markvarðar og svo með marki David Dunn eftir skyndisókn á 31. mínútu.

Miðvörðurinn og markaskorarinn Thomas Vermaelen jafnaði leikinn í 1-1 á 17 mínútu og Robin van Persie jafnaði í 2-2 á 33. mínútu. Það var síðan Andrey Arshavin sem Arsenal yfir átta mínútum fyrir hálfleik eftir sendingu frá Cesc Fabregas sem lagði upp öll þrjú mörk liðsins í hálfleiknum.

Cesc Fabregas skora síðan sjálfur fjórða mark Arsenal á 57. mínútu með þrumuskoti fyrir utan teig eftir sókn þar sem hann reyndi tvisvar að spila félaga sína fría.

Fabregas var reyndar ekki hættur því hann átti fjórðu stoðsendingu sína í leiknum þegar hann spilaði Theo Walcott frían sem þakkaði pent fyrir sig og skoraði fimmta mark Arsenal á 75. mínútu. Fabregas var síðan skipt útaf strax eftir markið.

Það var síðan Daninn Nicklas Bendtner sem innsiglaði sigur Arsenal með frábæru skoti fyrir utan teig á 89. mínútu en hann var að spila sinn fyrsta leik eftri að hafa klessukeyrt bílinn sinn á dögunum.