Agger íhugaði að hætta vegna bakmeiðsla

Varnarmaðurinn Daniel Agger hjá Liverpool hefur ekki átt sjö dagana sæla hvað varðar meiðsli síðan hann kom til enska félagsins frá Bröndby í janúar árið 2006.

Hinn 24 ára gamli landsliðsmaður Danmerkur viðurkennir í nýlegu viðtali við Jyllandsposten að hann hafi jafnvel íhugað að leggja skóna á hilluna vegna þrálátra bakmeiðsla.

„Ég fann svo mikið til í bakinu að ég íhugaði alvarlega að hætta að spila fótbolta. Ég spurði sjálfan mig hvort að þetta væri þess virði að halda áfram ef ég myndi ekki getað fengið bót meina minna. Ég meina þegar þú getur ekki lyft barninu þínu upp úr rúminu á morgnanna þá er eitthvað að," segir Agger.