Ögmundur: Var vísað á dyr

Óeiningin innan Vinstri grænna varð til þess í gær að hvorki Ögmundur Jónasson né Guðfríður Lilja Grétarsdóttir vildu flytja ræðu við umræður um stefnuræðu forsætisráðherra, eins og mælst hafði verið til við þau.

„Mér finnst ég ekki vera heppilegur kandídat að tala fyrir hönd ríkis­stjórnar sem nýverið hefur vísað mér á dyr," segir Ögmundur. „En ég er eindreginn stuðningsmaður ríkisstjórnarinnar þótt ég hafi ekki beinlínis geð í mér þessa stundina til að gerast helstur málsvari hennar." Hann var ekki viðstaddur stefnuræðuna og umræður um hana í gær vegna veikinda.

Þá var þingflokksfundi sem fram átti að fara í gær frestað. Sú ástæða er gefin upp fyrir því að of margir hafi ekki getað komist á fundinn, en heimildir herma að innan flokksins hafi einfaldlega verið talið tilgangslítið að ræða þennan ágreining án flokksformannsins. Hann snýr aftur af fundi Alþjóðagjaldeyrissjóðsins í Tyrklandi á miðvikudag.

Samkvæmt heimildum Fréttablaðsins gramdist efasemdarmönnum um Icesave-samninginn innan VG mjög þegar Steingrímur J. Sigfússon sagðist í fjölmiðlum daginn eftir kvöldfund þingflokksins á miðvikudaginn var hafa fullt umboð til að leiða Icesave-málið til lykta. Þeir töldu sig ekki hafa veitt honum óskorað umboð til að klára málið, heldur þyrfti það alltaf að koma aftur til kasta þingflokksins. Þetta varð til þess að þeir álitu að samkomulag um að ræða ekki ágreininginn í flokknum opinberlega væri fyrir bí. Í kjölfarið talaði Guðfríður, nánasti samherji Ögmundar, mjög opinskátt í Sjónvarpinu um brotthvarf Ögmundar úr ríkisstjórn.

Ummæli Guðfríðar, sem sakaði ríkisstjórnina meðal annars um ólýðræðisleg vinnubrögð, hafa valdið uppnámi og sagði meðal annars í fréttum Stöðvar 2 í gær að ekki væri útilokað að andófsarmurinn, sem í eru, auk Ögmundar og Guðfríðar, Atli Gíslason, Ásmundur Einar Daðason og Lilja Mósesdóttir, klyfi sig úr flokknum.

Ólíklegt er þó að til úrsagna úr þingflokknum komi, að sögn heimildarmanna blaðsins. Allir þingmenn og áhrifamenn í Vinstri grænum séu einhuga um það að halda lífi í ríkisstjórninni. Þar innanbúðar geti menn ekki hugsað sér að Sjálfstæðisflokkurinn komist aftur til valda, eins og líklegt er fari þessi ríkisstjórn frá.

Í samtali við Fréttablaðið í gærkvöldi sagðist Steingrímur ekki óttast klofning í flokknum. Hann líti svo á að hann hafi óskorað umboð þingflokksins til að láta reyna á hvort hægt verði að ná niðurstöðu í Icesave-málinu, sem síðar yrði kynnt flokksmönnum og öðrum.