Fellaini frestaði endajaxlaaðgerð og fékk sýkingu

Belginn Marouane Fellaini hefur greint frá því að hann frestaði endajaxlatöku vegna mikilla meiðsla í herbúðum Everton.

Það hins vegar olli því að Fellaini fékk sýkingu í háls sem hefur haft áhrif á hans frammistöðu með liðinu til þessa á tímabilinu.

Fellaini fór svo í endajaxlatökuna í gær enda er enska úrvalsdeildin komin í frí vegna landsleikjanna sem eru framundan.

„Þetta hefur verið sársaukafull reynsla," sagði Fellaini. „Ég fékk sýkingu í hálsinn sem gerði þetta enn verra fyrir vikið en maður verður að halda áfram fyrir liðið."

Everton hefur ekki náð að byrja eins vel og stuðningsmenn liðsins vonuðust til fyrir tímabilið og er í tíunda sæti ensku úrvalsdeildarinnar með tíu stig.

„Þetta hefur verið erfitt en við þurfum allir að leggja mikið á okkur fyrir liðið."