Sigmundur Davíð bestur - Gunnar Helgi í ruglinu

Ögmundur Jónasson var veikur heima þegar forsætisráðherra flutti stefnuræðu sína á Alþingi í kvöld. Hann horfði hinsvegar á umræðurnar í sjónvarpinu og þótti ýmsir góðir. Hrifnastur var hann þó af Sigmundi Davíð Gunnlaugssyni formanni Framsóknarflokksins. Ögmundur botnar ekkert í stjórnmálafræðiprófessor sem segir Ögmund halda ríkisstjórninni í gíslingu. „Þetta er óskiljanlegt rugl," segir Ögmundur um fullyrðingar prófessorsins.

Það vakti athygli að Ögmundur var víðsfjarri þingsal í kvöld en nokkuð hefur gustað um hann síðan hann hætti sem heilbrigðisráðherra í síðustu viku. Fréttir bárust af því í dag að hann hefði beðist undan því að mæla fyrir hönd VG í umræðum um stefnuræðu forsætisráðherra.

„Ég var bara lasinn heima," segir Ögmundur aðspurður um fjarveru sína.

„Ég horfði hinsvegar á þetta og mönnum mæltist ágætlega. Sigmundur Davíð þótti mér góður, ýmsir voru ágætir, en hann var bestur," segir Ögmundur.

Aðspurður um ríkisstjórnarsamstarfið og hvað muni gerast á næstu dögum segir Ögmundur það ráðast með niðurstöðunni í Icesavemálinu.

Gunnar Helgi Kristinsson, stjórnmálafræðiprófessor, hélt því fram á Vísi í gærmorgun að Ögmundur héldi ríkisstjórninni í gíslingu. Þetta skilur Ögmundur ekki og spyr hvar Gunnar hafi lært fræði sín.

„Hvernig getur einstaklingur sem vill styrkja þingræðið og vill að þingið greiði atkvæði og útkljái þetta mál frjálst og óháð verið að halda mönnum í gíslingu. Þetta er óskiljanlegt rugl," segir Ögmundur allt annað en ánægður.

„Maður sem að víkur úr ríkisstjórn sem hótar að sprengja sjálfa sig í loft upp ef viðkomandi hverfur ekki frá afstöðu sinni er sakaður um að halda ríkisstjórninni í gíslingu. Þetta er eitthvað skrýtið."

Þannig að þú varst frekar að bjarga henni?

„Ég hefði haldið það frekar."

„Ég er hræddur um að ég hefði fallið á prófi Gunnars Helga og ég bíð ekki í þá sem ná prófi í þessum vísindum."