Koss dauðans

Timothy Geithner, núverandi fjármálaráðherra Bandaríkjanna, kallaði aðstoð Alþjóðagjaldeyrissjóðsins "koss dauðans" í samtali við Davíð Oddsson, þáverandi seðlabankastjóra, nokkru áður en ríkisstjórn Íslands ákvað að leita á náðir sjóðsins.

Lýsing á samtölum Davíðs og Geithners kemur fram í bók Styrmis Gunnarssonar, fyrrverandi ritstjóra Morgunblaðsins, en hún nefnist Umsátrið - Fall Íslands og endurreisn.

Styrmir segir frá því í bók sinni að um mitt ár hafi Davíð Oddsson, þáverandi seðlabankastjóri, hitt Timothy Geithner, núverandi fjármálaráðherra Bandaríkjanna en þá var hann einn af aðstoðarseðlabankastjórum bandaríska seðlabankans. Davíð spurði Geithner hvort bandaríski seðlabankinn gæti lánað Íslendingum 2-3 milljarða dollara. Viðbrögð Geithners nokkru síðar voru á þá lund að sú upphæð skipti engu máli því vandi Íslendinga væri yfirþyrmandi.

Styrmir segir að Davíð hafi í þessu samtali sagt Geithner frá því að bankastjóri Seðlabanka Evrópu hefði hefnt þann möguleika að Ísland leitaði til Alþjóðagjaldeyrissjóðsins. Orðrétt segir Styrmir: „Viðbrögð Geithners voru þessi, þar sem þeir tveir stóðu með kaffibolla í höndunum í fundarhléi: „Aha. He offered you the kiss of death." Eða, aha, hann bauð þér upp á koss dauðans.

Styrmir segir að síðustu mánuði ársins 2008 hafi verið skiptar skoðanir um hvort leita ætti til AGS. Þá hafi Poul Thomsen, starfsmaður sjóðsins, komið til landsins og átt fundi með Geir Haarde. Geir lagði mikla áherslu á að Ísland væri þróað land og það gengi ekki að sjóðurinn umgengist Íslendinga eins og þriðja heims ríki. Fékk Geir loforð um að það yrði ekki gert. Að lokum fundi með Geir á Thomsen að hafa tekið upp símann og hringt í yfirmann sinn og sagt þessa athyglisverða setningu: "I got him," eða ég náði honum.