Vegurinn fái heitið Þröskuldar

Þegar Kristján L. Möller samgönguráðherra klippti á borðann þann 14. október var letrað á vígsluskærin "Djúpvegur (61) um Arnkötludal". Gallinn við Arnkötludalsnafnið er að vegurinn liggur líka um Gautsdal, segir Viktor Arnar Ingólfsson, ritstjóri Framkvæmdafrétta í grein sinni. Reyndar hefur Vegagerðin einnig kastað fram nafninu Tunguheiði, enda leysir vegurinn af slóðann um Tröllatunguheiði, sem liggur nánast samhliða milli Gilsfjarðar og Steingrímsfjarðar.

En nú er komin fram ný hugmynd að nafni; Þröskuldar. Viktor vitnar í starfsmenn Vegagerðarinnar á Hólmavík, sem stungu upp á að vegurinn yrði nefndur eftir heiðinni sem hann liggur um og skilur að Gautsdal og Arnkötludal, en heiðin nefnist Þröskuldar. Segir í fréttabréfi Vegagerðarinnar að framvegis verði varað við hálku á Djúpvegi um Þröskulda þegar það eigi við. Hvort það nafn verði ofaná muni koma í ljós en sér finnist líklegt, segir Viktor, að Þröskuldar verði málvenjan, enda skemmtilegt og óvenjulegt örnefni.

Vera má að það nafn muni líka hæfa ágætlega, miðað við ljósmynd sem er á öðrum stað í fréttabréfinu, en hún sýnir mikinn fossúða fjúka yfir veginn í Þröskuldum, sem geti myndað þar hættulegt svell, -sem þar með verður þröskuldur.