Sauðfjárbændur mótmæla afnámi niðurgreiðslu refaveiða

Landssamtök sauðfjárbænda mótmæla því harðlega að ríkið hætti að niðurgreiða refaveiðar. Í tilkynningu frá samtökunum segir að gangi það eftir sé hætta á því að sveitarfélög muni ekki lengur standa fyrir skipulögðum refaveiðum.

Það hefur í för með sér verulega fjölgun á ref með ófyrirséðum afleiðingum fyrir lífríkið í landinu að mati samtakanna. Sindri Sigurgeirsson formaður Landssamtaka sauðfjárbænda segir ákvörðun umhverfisráherra alveg taktlausa.

„Í mörg ár hefur Búnaðarþing ályktað um refa- og minkaveiðar, þar sem lögð hefur verið áhersla á að ríkið auki það fjármagn sem farið hefur til niðurgreiðslu veiðanna," segir Sindri og bendir á að áhersla hafi verið lögð á það af hálfu bænda að halda þurfi refastofninum í skefjum vegna þess skaða sem hann veldur á lífríki landsins. „Það er með ólíkindum að nú sé tekin ákvörðun um spara það litla fjármagn sem farið hefur í veiðarnar. Skynsamlegra hefði verið að auka þetta fjármagn, sem skilar í raun auknum tekjum í rikissjóð í gegnum virðisaukaskatt".