Svandís sökuð um hryðjuverkaárás

Þingmenn Suðurkjördæmis funduðu í hádeginu, að frumkvæði oddvita kjördæmisins, Samfylkingarþingmannsins Björgvins G. Sigurðssonar, til að meta afleiðingar ákvörðunar Svandísar Svavarsdóttur í gær. Stefán Thors, skipulagsstjóri ríkisins, segir þetta geta þýtt eins til tveggja ára töf í versta falli, í besta falli tveggja til þriggja mánaða töf.

Þingmenn Samfylkingarinnar lýsa vonbrigðum með ákvörðun Svandísar en segjast treysta því að töfin verði ekki lengri en tveir mánuðir. Björgvin segir að ef framkvæmdin yrði send í sameiginlegt mat á umhverfisáhrifum þýddi það mikið lengri frestun og það styðji hann að sjálfsögðu ekki enda megi ekki breyta leikreglum eftirá.

Sjálfstæðisþingmaðurinn Ragnheiður Elín Árnadóttir segir að ekki bara álver, heldur einnig gagnaver, kísilver og raforkuöryggi heimila á Suðurnesjum, séu sett í uppnám. Að hennar mati sé þetta óskiljanleg og fullkomlega galin ákvörðun.

Árni Johnsen tók enn sterkar til orða og sagði þetta skemmdarverk og meira en það: Þetta væri hryðjuverkaárás á stöðuna í landinu í þegar 1.600 manns væru atvinnulausir á Suðurnesjum.

Framsóknarþingmaðurinn Sigurður Ingi Jóhannsson ítrekar fyrri orð um atlögu umhverfisráðherra gegn atvinnulífinu. Skilaboðin til erlendra fjárfesta væru einnig afar slæm; að hér væru ekki stjórnvöld sem hægt væri að treysta.

Samtök atvinnulífsins lýstu því yfir í dag, að með því að taka sér þremur mánuðum lengri tíma til að úrskurða en lög gerðu ráð fyrir, hefði umhverfisráðherra brotið lög. Samtökin telja úrskurð ráðherrans því marklausan og segja sjálfsagt að framkvæmdaaðilar haldi sínu striki.