Watson með hæstu launin

Emma Watson er hæst launaða leikkona áratugarins. Watson leikur Hermione Granger í kvikmyndunum um Harry Potter sem hófu göngu sína 2001. Hún er með hærri laun en leikkonur á borð við Juliu Roberts, Halle Berry og Cameron Diaz og er nú komin í heimsmetabók Guinness fyrir vikið.

Leikkonan, sem er 19 ára, hefur leikið í sex kvikmyndum auk þess sem hún talaði inn á teiknimyndina The Tale of Despereaux. Í viðtali við breska fjölmiðla sagði Watson vinsældir Harry Potter-myndanna hafa komið sér á óvart, en hún var aðeins níu ára þegar hún fór í prufu fyrir hlutverkið árið 1999. „Ég hafði ekki hugmynd um stærðargráðu myndanna. Ef ég hefði vitað það hefði ég orðið agndofa," segir hún.