Segir trúnaðarsamning endurspegla nauð samningagerðarinnar

„Ég held að bæði í þessum uppgjörssamningi og almennt séu gríðarlega mörg atriði þar sem hallar á Íslendinga," segir Tryggvi Þór Herbertsson, hagfræðingur og þingmaður Sjálfstæðisflokks, um uppgjörssamning Íslendinga og Breta vegna Icesave samningsins.

„Sá samningur er allur viðsemjundum í hag og mér finnst hann um leið endurspegla þá nauð sem þessi samningagerð virðist hafa verið undir."

Fréttastofa hefur uppgjörssamninginn undir höndum, en hann hefur hingað til hefur verið stimplaður sem trúnaðarmál.

Þar kemur meðal annars fram að Íslendingar geti einungis leitað til breskra dómstóla rísi upp ágreiningur vegna samningsins, en Bretar hins vegar til hvaða dómstóls sem er.

Aðspurður hvort einhver réttlæting sé á slíku ákvæði segir Tryggvi eðlilegt að í lánasamningi milli einkaaðila velji lánveitandinn varnarþing samningsins.

„Ef maður myndi líta á þetta sem lánasamning milli einkaaðila þá væri þetta ekki svo óeðlilegt ákvæði, en þessi samningur á náttúrulega að vera á einhverju þjóðréttarlegu stigi."

Tryggvi segist helst vilja sjá samið upp á nýtt, en þykir líklegast að lokaniðurstaðan verði sú að settir verði fyrirvarar við samninginn.

Hann segir í öllu falli ljóst að ekki sé hægt að skrifa undir samningana óbreytta.

„Það eru svo miklir nauðasamningar að við getum aldrei samþykkt þá."