Vestmannaeyingar skora á Steingrím

Bæjarráð Vestmannaeyja kom saman í dag á aukafundi til að fjalla um loðnuveiðar. Ráðið skorar á Steingrím J. Sigfússon, sjávarútvegs- og landbúnaðarráðherra, að gefa tafarlaust út 30 til 50 þúsundtonna upphafskvóta í loðnu.

Í greinargerð segir að Vestmannaeyjabær hafi fullan skilning á mikilvægi þess að sjávarauðlindin sé umgengin af virðingu. Bærinn hafi með ráðum og dáð staðið við bakið á ábyrgri fiskveiðistjórnun.

4-6 milljarða gjaldeyristekjur

,,Hinsvegar liggur nú fyrir að ástandið í efnahagslífi þjóðarinnar kallar á að einskis sé látið ófreistað í að skapa þjóðarbúinu tekjur. Á næstu klukkutímum og sólarhringum er loðnan verðmætust enda færi hvert kíló til manneldis af því sem nú veiðist. Varlega áætlað má gera ráð fyrir að 30 til 50 þúsundtonna upphafskvóti myndi skapa þjóðarbúinu gjaldeyristekjur upp á 4 til 6 milljarða og hleypa miklu lífi í atvinnulíf þjóðarinnar. Þá er einnig miklivægt að hafa hugfast að fyrstu tonnin eru að öllu jöfnu þau verðmætustu."

Ábyrgur fyrir efnahag þúsunda heimila

Sjávarútvegsráðherra fer með ákvörðunarvaldið fyrir hönd ríkisstjórnar hvað ákvörðun þessa varðar, segir í greinargerð bæjarráðs. Hann sé þannig ábyrgur fyrir atvinnuástandi og efnahag þúsunda íslenskra heimila. ,,Í núverandi ástandi kann að þurfa að seinka eitthvað uppbyggingu nytjastofna því nú þarf að veiða og vinna eins mikið og stofnar þola. Álit sjómanna og útgerða liggja fyrir og eru þær nær einróma hvað varðar þá skoðun að óhætt sé að gefa út lágmarks upphafskvóta í loðnu."