Formanni Blaðamannafélagsins sagt upp hjá Morgunblaðinu

Formanni Blaðamannafélagsins og blaðamaður hjá Morgunblaðinu, Þóru Kristínu Ásgeirsdóttur, hefur verið sagt upp störfum hjá blaðinu. Þegar hefur fjölda starfsmanna verið sagt upp vegna víðtækra skipulagsbreytinga og telja þeir hátt á annan tug.

Þóra Kristín staðfesti við Vísi að henni hefði verið sagt upp störfum. Sjálf vill hún ekki tjá sig um málið enn sem komið en segir að Blaðamannafélagið sé að skoða uppsagnirnar og búast megi við viðbrögðum síðdegis í dag.

Vísir greindi frá því fyrr í morgun að Haraldur Johannessen og Davíð Oddsson hafi mætt á fund stjórnar Árvakurs í gærdag. Ekki er ljóst hvað var rætt en fjölmiðlar hafa greint frá því að hugsanlega taki þeir við sem ritstjórar Morgunblaðsins.

Það hefur ekki fengist staðfest.

Starfsmannafundur verður haldin klukkan hálf fimm í dag. Þá munu málin hugsanlega skýrast.