Samfylkingin fari ekki í stjórn nema ESB-umsókn verði tryggð

Samfylkingunni ber skylda til að tryggja að Ísland sæki um aðild sem fyrst og leggja samninginn í dóm þjóðarinnar, að mati Ungra jafnaðarmanna, ungliðahreyfingar flokksins.

„Að öðrum kosti fari hún ekki í ríkisstjórn. Þannig tekur hún málið úr höndum þingsins og færir í hendur þjóðarinnar,“ segir í ályktun sem Ungir jafnaðarmanna hafa sent frá sér vegna yfirstandandi stjórnarmyndunarviðræðum Samfylkingar og Vinstri grænna.

Stærsta vandamál Íslands í dag er gjaldþrota peningamálastefna, að mati Ungra jafnaðarmanna. Gjaldþrot peningamálastefnunnar bætist ofan á alþjóðlega bankakreppu sem gerir það að verkum að enn brýnna sé að leysa vanda íslensku krónunnar.

„Besta lausnin er að taka upp evru með stuðningi frá Evrópska seðlabankanum. Til þess að það sé mögulegt þurfum við að ganga í Evrópusambandið með öllum þeim kostum og göllum sem því fylgja,“ segja Ungir jafnaðarmenn sem telja að kostirnir vegi miklu þyngra.

Ungir jafnaðarmenn vilja að Samfylkingin og Vinstri græn myndi nýja ríkisstjórn. „Til að svo megi verða þurfa flokkarnir að færa valdið til þjóðarinnar. Þjóðin á að ákveða hvort hún vilji upptöku evru og hvort hún gangi í Evrópusambandið að undangengnum samningaviðræðum.“