Íslenskir bændur eru heilsuhraustastir allra

Bændur eru heilbrigðastir Íslendinga andlega og líkamlega samkvæmt tveimur rannsóknum sem birtast í nýjasta hefti Læknablaðsins.

Starf bænda hefur lengst af verið í námum tengslum við heimili þeirra og fjölskyldu. Í vestrænum heimi hefur starf þeirra þó breyst mikið á síðustu áratugum og jafnvel er talað um byltingu í starfsgreininni. Sprottið hafa upp kenningar um að bændum sé hættar við ýmsum geðsjúkdómum en öðrum í samfélaginu og hafa rannsóknir frá Noregi og Bandaríkjunum rennt stoðum undir þær. Á Íslandi virðist þessu öfugt farið, hér eru bændur hvað sáttastir allra þegna við vinnu sína. Rannsóknir leiddu til dæmis í ljós að kvenkyns bændur voru ánægðari með störf sín í samanburðarhópi. Bændur reyktu líka mun minna en fólk á mölinni og drukku minna áfengi. Þá kom í ljós að bændum þótti vinnan frekar vera krefjandi en samanburðarhópnum en á jákvæðan hátt.

Önnur rannsókn sem einnig birtist í Læknablaðinu sýnir svo að bændum er mun minni hætta búin á því að fá krabbamein en öðru fólki. Sú stóð yfir í allt að 45 ár á Norðurlöndunum og leiddi hún í ljós að lífshættir, menntun og aðrar aðstæður vinnandi fólks hafa afgerandi áhrif á krabbameinstíðni. Bændur og garðyrkjumenn reyndust í minnstri hættu. Í mestri hættu var starfsfólk veitingahúsa.

Í greininni kemur fram að þeir sem unnu að rannsókninni fyrir hönd Íslands segja áfengisneyslu og reykingar eru afgerandi áhættuþættir en mataræði kom þar næst á eftir. Nú sé tími til að snúa við blaðinu og hefja áróður fyrir heilsusamlegra mataræði þjóðarinnar í stað skyndibitamenningarinnar. Ef árangur næst spari það þjóðarbúinu ómælda peninga og fjöldi fólks bæti góðum árum við líf sitt.