Liverpool gengur betur án Torres

Rafa Benitez knattspyrnustjóri Liverpool hefur sagt að meiðsli framherjans Fernando Torres séu ein helsta ástæða þess að liðinu hefur ekki gengið nógu vel í deildinni í vetur.

"Kannski væri staða okkar í deildinni önnur ef Torres hefði ekki verið meiddur," sagði Benitez í viðtali nýlega.

Spænski framherjinn hefur vissulega verið svipur hjá sjón í vetur vegna meiðsla, ekki síst ef miðað er við form hans á síðustu leiktíð, en hefur Liverpool verið betra lið með Torres innanborðs á þessari leiktíð?

Blaðamenn Daily Mail ákváðu að reyna að svara þessari spurningu og fóru djúpt ofan í kjölinn á leikjum liðsins með og án Torres.

Þar kemur í ljós að Liverpool gengur í raun örlítið betur án spænska framherjans, en munurinn er í raun afar lítill.

Liverpool hefur fengið 31 af 55 stigum sínum í leikjum þar sem Torres hefur spilað en hefur samt náð í 24 stig í þeim 12 leikjum sem Spánverjinn hefur misst af vegna meiðsla.

Torres kom ekki við sögu í tveimur tapleikjum Liverpool, gegn Tottenham og Middlesbrough, en hefur verið í liðinu í sjö af tíu jafnteflisleikjum liðsins. Þar tapar Liverpool fjórtán stigum.

Torres hefur misst af sjö af fimmtán sigrum Liverpool í úrvalsdeildinni og þegar þessar staðreyndir eru hnýttar saman kemur í ljós að árangur Liverpool með og án Torres er mjög svipaður.

Liverpool hefur fengið 2,0667 stig að meðaltali í leik þar sem Torres spilar og 2,0769 stig í leikjum sem hann spilar ekki.

Þessi tölfræði væri eflaust eitthvað öðruvísi ef Torres hefði verið heill í allan vetur, en gefur þó strangt til tekið mynd af því hvernig liðinu hefur vegnað með og án kappans - meiddum eða ómeiddum.