Keane hefur áhuga á að fá Campbell til Ipswich

Knattspyrnustjórinn Roy Keane hjá Ipswich hefur viðurkennt að hann muni fylgjast náið með málum varnarmannsins Sol Campbell sem fékk sig lausan frá samningi við Notts County í fyrradag.

Keane á þó von á því að hann verði ekki einn um hituna þegar félagaskiptaglugginn opnar í janúar.

„Campbell getur ekki spilað fyrr en í janúar þannig að við munum fylgjast náið með því hvað gerist í hans málum. Það er pottþétt að mörg félög munu sína honum áhuga og við verðum eitt þeirra.

Ég get annars ekki sagt að ákvörðun hans að hætta hjá Notts County hafi komið mér í opna skjöldu. Ég dáist af þeim sem eru tilbúnir að taka ákvarðanir sem þessar því ég veit að það væru margir sem hreinlega myndu ekki þora því og væru sáttir bara með að sitja rólegir og taka við launaumslögum," segir Keane í viðtali við Sky Sports fréttastofuna.