Heimir Hallgríms: Framfarir á liðinu

Heimir Hallgrímsson, þjálfari ÍBV, var sáttur við sína menn í leikslok. „Það hefur verið mikill stígandi í þessu hjá okkur, fimm leikir án þess að tapa, fyrsti leikurinn sem við fáum ekki á okkur mark og mér finnst sjáanlegar framfarir á liðinu."

Heimir sagði einnig að andinn í hópnum væri góður og létt yfir mönnum enda Þjóðhátíð í vændum. „Það er alltaf léttara og skemmtilegra í kringum sigurleiki, við unnum Blikana seinast á útivelli og það er bara búið að vera gaman hjá okkur síðustu vikur, margt að gerast og Þjóðhátíð í vændum þannig að það er gleði."

Eyjamenn eru á miklu flugi þessa dagana en koma þeir sterkir til baka eftir Þjóðhátíð? „Þetta eru svipaðar aðstæður og fyrir landsleikjahléið, þá unnum við tvo leiki í röð, svo kom pásan og eftir hana töpuðum við nokkrum leikjum í röð. Ég ætla bara að vona að það endurtaki sig ekki. Það verður auðvitað svolítið að gera hjá okkur í þessuhléi en ég held að við komum bara ferskir til baka."