Heimir Guðjónsson: Sýndum fádæma kæruleysi

Heimir Guðjónsson þjálfari FH var jafn ósáttur við leik FH í lok fyrri hálfleiks og upphafi þessi síðari gegn Breiðablik í kvöld og hann var ánægður með fyrsta hálftímann og sigurinn í leiknum.

"Við spiluðum virkilega vel fyrsta hálftímann og skoruðum eitt mark. Við hefðum getað skorað fleiri en það er í stöðunni 1-0 að það þarf ekki mikið að gerast og við sýndum af okkur fádæma kæruleysi síðasta korterið í fyrri hálfleik og hleyptum þeim inn í leikinn," sagði Heimir eftir leikinn.

"Daði hélt okkur í lok fyrri hálfleiks en í byrjun síðari hálfleiks þá hélt sama ruglið áfram, algjört ofmat á eigin getu. Efir að þeir jafna þá fannst mér við taka okkur aðeins saman í andlitinu og náðum að klára þennan leik og landa gríðarlega mikilvægum sigri."

"Varnarleikurinn síðasta korterið og fyrstu tíu, fimmtán í síðari var ekki nógu góður. Menn gáfu boltann frá sér á hættulegum stöðum og hleyptu Blikunum inn í þetta. Þeir vorum með hlaup upp í hornin sem við náðum ekki að loka nógu vel á þessum kafla. Þegar leið á seinni hálfleik þá náðum við að loka betur fyrir þetta."

FH hefur misst nokkra varnarmenn í meiðsli á leiktíðinni og voru Guðmundur Sævarsson, Hjörtur Logi Valgarðsson, Pétur Viðarsson og Freyr Bjarnason fyrir utan hópinn í dag en allir hafa þeir spilað mikið í vörn FH í sumar.

"Það er ekkert launungarmál að vörnin er það sem þú vilt síst breyta. Engu að síður hafa þessir menn sem hafa komið inn staðið sig vel. Breiðablik er með gott fótboltalið eins og sást í kvöld."

"Spilamennskan var frábær fyrsta hálftímann og batna aftur er leið á seinni hálfleikinn. Við tökum það með okkur úr þessum leik að þegar við spilum í fáum snertingum og látum boltann ganga þá erum við í góðum málum en ef við ætlum að vera með flóknar útfærslur úti á vellinum þá lendum við í vandræðum," sagði Heimir Guðjónsson.