Hrá Rihanna

Á fjórðu plötunni sinni vill söngkonan Rihanna vera klúrari og meira töff en á poppsmellum eins og „Umbrella“. Platan heitir Rated R og kemur með viðvörunarmiða vegna sóðaorðbragðs. Tónlistin er harðari og hrárri en áður og Rihanna tekur fyrir persónuleg málefni, eins og stormasamt samband sitt við Chris Brown. „Það getur hver sem er búið til poppsmelli en ekki allir gert góðar plötur,“ segir Rihanna, sem vill sanna sig á þessari plötu sem listamann, en ekki bara vera poppdíva. Undirtektir gagnrýnanda hafa verið mjög góðar. „Ein af poppplötum ársins,“ lýsti Rolling Stone til að mynda yfir.