Margir minnast Helga Hós

„Mér þætti það ferlegt ef allar stundirnar sem karlinn stóð hérna á horninu myndu bara gleymast,“ segir Alexander Einarsson, stofnandi Facebook-síðu um það baráttumál að minnisvarða verði komið upp um Helga Hóseasson á horni Langholtsvegar og Holtavegar. Þar stóð Helgi með sín heimatilbúnu skilti og ávann sér sæmdarheitið „Mótmælandi Íslands“. Helgi lést á elliheimilinu Grund á sunnudaginn, 89 ára að aldri.

„Ég bý hérna í hverfinu og við Helgi ræddum oft málin. Ég flutti hingað árið 2001 og þá var hann víst búinn að standa á horninu árum eða áratugum saman,“ segir Alexander, en Helgi bjó á Holtavegi. „Þegar ég bar út blöð þá var hann alltaf mættur á hornið klukkan sex þegar ég átti leið fram hjá. Hann sagði að ég væri að dreifa óhróðri og lygum, en að það væri svo sem ekki mér að kenna.“

Alexander segist sjá fyrir sér minningarskjöld í gangstéttinni þar sem Helgi stóð og mótmælti. „Sumir hafa nefnt einhvers konar styttu, en ég veit nú kannski ekki með það. Ég er opinn fyrir öllum hugmyndum og það gleður mig virkilega að sjá hversu góð viðbrögðin hafa verið á Facebook,“ segir hann.

Í gær voru meira en 5.000 manns komnir í Facebook-grúppuna. Þá höfðu margir lagt leið sína að horninu og lagt blóm á sviðinn og útkrotaðan strætisvagnabekkinn sem þar er. Einnig var búið að leggja eftirlíkingu af einu frægasta skilti Helga, „Hver skapaði sýkla“, við bekkinn.

Áhugafólk um minningarskjöld á að fara með erindi þess efnis fyrir skipulagsráð Reykjavíkurborgar, þar sem það yrði tekið fyrir. Með þennan meðbyr ætti slíkur skjöldur að vera raunhæft takmark. - drg