Sundboltar bannaðir á Anfield um helgina

Það verður leitað á stuðningsmönnum Man. Utd á Anfield á sunnudag og þá sérstaklega að sundboltum. Þeir sem mæta með sundbolta mega gera ráð fyrir að tapa boltunum.

Grunur er á því að stuðningsmenn United ætli sér að heiðra minningu marks Darrens Bent með því að kasta sundboltum inn á völlinn og það ætla starfsmenn á Anfield sér að koma í veg fyrir.

Sundboltarnir góðu eru uppseldir á vefverslun Liverpool og er talið að stuðningsmenn United eigi stærstan heiður á því.

Drengurinn ungi sem kastaði boltanum inn á völlinn um síðustu helgi er orðinn heimsfrægur. Það hafa verið stofnaðar fjölmargar stuðningssíður á Facebook honum til heiðurs. Einnig hefur borið nokkuð á hatri í hans garð á internetinu og er lögreglan að skoða þau mál.

Lögreglan í Liverpool hefur ekki enn borið kennsl á drenginn en staðfest er að hann þurfti ekki lögreglufylgd af vellinum eftir Sunderland-leikinn.