Mark Hughes: Adebayor fékk sanngjarna refsingu

Mark Hughes, stjóri Manchester City, segir refsingu Emmanuel Adebayor, fyrir fagnaðarlæti sín á móti Arsenal, vera sanngjarna. Adebayor fékk tveggja leikja skilorðsbundinn dóm og 25 þúsund punda sekt fyrir það að hlaupa allan völlinn eftir að hafa skorað svo að hann gæti fagnað marki sínu fyrir framan stuðningsmenn Arsenal.

Mörgum þótti Emmanuel Adebayor sleppa vel en hann er nýkominn úr þriggja leikja banni fyrir að traðka á andliti Robin Van Persie í sama leik. Han getur nú spilað næsta leik Manchester City liðsins sem er á móti Aston Villa á Villa Park á mánudaginn.

„Ég held að þetta sé í samræmi við það sem hefur verið dæmt í svona málum hingað til. Peningasektin er jafnvel mun hærri en áður hefur sést. Við vissum að það væri hætta á því að hann fengi fleiri leiki í bann en við erum þakklát fyrir að það gerðist ekki því okkur vantar sterka leikmenn," sagði Mark Hughes.

„Þetta atvik gerðist fyrir mörgum vikum og ég held að það sé kominn tími á að allir hætti að hugsa um þetta og snúi sér að öðru," sagði Hughes.