Sjálfsmark tryggði United stig í uppbótartíma

Manchester United náði að tryggja sér 2-2 jafntefli á móti Sunderland í ensku úrvalsdeildinni í kvöld. Anton Ferdinand skoraði sjálfsmark á annarri mínútu í uppbótartíma eftir gríðarlega pressu Manchester United í lokin. Sunderland komst tvisvar yfir í leiknum en lék manni færri síðustu mínúturnar.

Darren Bent skoraði eina mark fyrri hálfleiksins þegar hann kom Sunderland í 1-0 strax eftir sjö mínútna leik. Þetta var áttunda mark hans í deildinni.

Dimitar Berbatov jafnaði leikinn í upphafi seinni hálfleiks með glæsilegri hjólhestaspyrnu en Kenwyne Jones kom Sunderland aftur yfir.

Það var síðan Anton Ferdinand sem stýrði boltanum í autt markið eftir að skot Patrice Evra stefndi framhjá. Manchester pressaði stíft í lokin eftir að Kieran Richardson var rekinn útaf með sitt annað gula spjald.

Steve Bruce og lærisveinar hans í Sunderland voru rosalega nálægt því að sækja þrjú stig á Old Trafford en Steve Bruce hefur því enn ekki náð stýra sínu liði sigurs á móti gamla læriföður sínum Sir Alex Ferguson.