West Ham bauð Eiði Smára risasamning í sumar

Samkvæmt News of the World mun West Ham hafa boðið Eiði Smára Guðjohnsen 70 þúsund pund í vikulaun fyrir að spila með félaginu í ensku úrvalsdeildinni.

Eiður Smári hafnaði þó öllum tilboðum sem bárust í hann úr ensku úrvalsdeildinni og ákvað að ganga til liðs við Monaco í frönsku úrvalsdeildinni.

Þetta kemur fram í frétt blaðsins um launamál West Ham sem er sagt í miklum ólestri.

Nokkrir leikmenn, til að mynda Scott Parker, Carlton Cole, Robert Green og Dean Ashton eru sagðir á himinháum launum - svipuðum þeim og Eiði Smára var boðið í sumar.

Að sama skapi eru margir ungir leikmenn hjá félaginu með allt niður í 400 pund í vikulaun. Ungstirnin James Tomkins mun vera með fjögur þúsund pund í vikulaun og Jack Collison tvö þúsund pund. Junior Stanislas er með 1500 pund.

Forráðamenn West Ham eru sagðir óttast að ungir og efnilegir leikmenn munu fara frá félaginu á næstunni nema að þetta verði lagað. Það mun þó vera erfitt enda á félagið í miklum fjárhagslegum vandræðum.

Björgólfur Guðmundsson keypti félagið árið 2006 og þegar Eggert Magnússon var stjórnarformaður var samið við marga leikmenn um himinhá laun.

Félagið er nú í eigu CB Holding, eignarhaldsfélag sem aftur er í eigu Straums.