Bendtner: Kraftaverk að ég skuli hafa sloppið ómeiddur

Nicklas Bendtner, danski framherjinn hjá Arsenal, segir það hafa verið sannkallað kraftaverk að hann skuli hafa sloppið ómeiddur þegar hann klessukeyrði bílinn sinn um síðustu helgi. Bendtner var á leiðinni á æfingu á sunnudaginn þegar hann missti stjórn á Aston Martin bíl sínum sem fór á steypugirðingu og endaði loks á tré.

Bendtner missti af leiknum á móti Olympiakos í Meistaradeildinni í vikunni en það var aðallega vegna sálarlífsins því hann fékk aðeins nokkra skurði og marbletti á hnjám og öxl í slysinu.

Bendtner vonast eftir því að spila á móti Blakcburn um helgina.

„Það var einhver sem passaði upp á mig. Ég veit ekki hver eða hvernig en það var einhver þarna. Ég trúi því að það hafi bara ekki verið kominn tími fyrir mig að yfirgefa þetta líf," sagði Bendtner.

„Lögreglan og aðrir á slysstaðnum sögðu mér að ég hefði ekki lifað slysið af hefði ég ekki verið í bílbelti. Þeir sögðu mér einnig að ég hefði einnig dáið ef ég hefði ekki verið á svona góðum og öruggum bíl," sagði Bendtner og bætti við: „Þeir töluðu hreinlega um kraftaverk að ég skildi ekki deyja eða slasast illa í þessum slysi," sagði Bendtner.

„Þetta var mikið áfall en ég þarf þó ekki að fara til sálfræðings til að vinna mig út úr þessu slysi. Ég fór og keyrði bíl móður minnar daginn eftir þannig að ég er í fínu andlegu standi," sagði Bendtner sem sagðist hafa verið að æft eins síns liðs fyrst eftir slysið.

„Nú er ég farinn að æfa með liðsfélögunum aftur og stefni á það að spila á móti Blakcburn," sagði Bendtner.